Ziangkim a ttha Zawngin 

Van Thawng Thang

Tuluk Radio ih a suahmi “Ziangkim a ṭha zawngin ruat-aw” timi sungih ta a si. 

Nu : Tuisun tlawnginn ah ka Paisa thawngkhat(Ks. 1000) ka thlauih ka hmu sal nawn lo ti-ah a ti.(A tha zawngin ruat-aw)
Fapa : Na va vanṭha ve thawnghra(Ks. 10000) a hlo loih.
Pa : A sartu cu a lung a awi nasa ding a si cu!
Nu : Tlawng ihsin ka tlun zikah Ruahpi a tak tukih a surih…
Fapa : Na va vanṭha ve. Ka Pu tei’ inn le tlawnginn a rak nai-aw ngel cel hi cu!
Pa : Tlawng tlung lam a si-ih a va zia um ve.
Nu : Ca ka zuam ruahin tui ṭum camibuai ka phi thei lemlo ee.
Fapa : Na van ṭha tuk aw. Final Exam a si lo cu!
Himi lekdan hi mi thinlung a lut zet vekin a ngaitu hrang khalah a nuam tuk.
Kan dung naite ih thilcang pakhat cu hi ti’n a si.
Nunau nauhak pakhat hi a duh zetmi a nazi(watch) a hloh ter ruangah rawl khal ṭha te’n ei thei lo, zaan khal thaw takin it thei lo, a thin na le har-in a um. Cu ti-ih a um cu a Pa in a hmuh tikah “Na paisa tinghra(1,000,000) hloh ter pang bang awla, tinghnih(200,000) hloh ter bet na siang kem?” tiah a sutih cu nute cun “ Lamlam. Ka hlo ter nawn lo ding,” ti-ah a sawn.
Cutikah a Pa cun “Cuti asi awkah ziangah saw nazi(watch) pakhat hloh ter menah na thinlung nomnak Zarhhnih sung rori na hloh ter? Cule na hriselnak thawn,” ti-ah a sut.
Cui caan lawngin cu nute cu mang(dream) ihsin a ṭhangtu pakhat vekin ihkhun ihsin zamrang zetin a ṭum vukvi ih, “A si. Ziangruangah ka nat betnak ding san? Ka thinlung nomnak le ka harhdamnak pawl ka hloh ter bet siang ding? A dang nazi pakhat lei thei dingin ka zuam sawn ding,” ti-ah a ti.
Nunnak cu hi ti hi a si ko. Sun caan a um vekin neh caan khal a um ding a si. Dik zet le ralṭha zetin kan nung ding. Cu lawngah nunnak tlamtling kan nei thei ding. Mi hrekkhat pawl cun hi thudik hi an pom duh lo. Curuangah an hlawhsamnak ihsin an hlawhsam sinsin ṭheu. A ṭha zawngih thil ziangkim a thlir thiamtu cun…
- Midang an va mawhthluk dah lemlo.
- Thinharnak pawl a tuardan an thiam.
- Thinlung nomnak kha an hnen ihsin an suak ter duh lo.
- Thinbangnak lamzin a hrialdan an thiam.
- A cau zetmi thinlung kha tha thar an neih ter sal.
- Hni siamsi te’n ziangkim an tuah thei.
- A thar ngah sal theinak thazaang an nei.
- A cem thei lomi ruahsannak thawn an nung.
Leh-awkdan le thuanthu cu hizat hi a si ko. Kan sinak dinhmun, kan thlennak hmun ih harsatnak kan ton caanah hi lehdan te le thuanthu hi kan hngilh lo cio ding beiseinak thawn…
Hminsin : Hi cahram hi Naing2 Sani ih “How to play to enjoy your life” timi ca a remcang danih leh(translate)mi a si.